20.12.2019

Icelandair Cargo hefur gert samning við FedEx og TNT um flutninga á öllum þeirra vörum til og frá Íslandi. Samningurinn, sem er til þriggja ára, tekur gildi í byrjun árs 2020. FedEx og TNT hafa sameinað starfsemi sína eftir kaup FedEx á TNT og stefna að því að auka umsvif sín hér á landi í samstarfi við Icelandair Cargo. FedEx er sem kunnugt annað af stærstu fraktflugélögum í heimi, með höfuðstöðvar í Bandaríkjunum.

Vegna samningsins verður nokkur breyting á flugáætlun Icelandair Cargo til Evrópu. Flug til Liege í Belgíu mun aukast verulega í ljósi þess að Liege er einn af aðal flugvöllum FedEx og TNT í Evrópu. Fraktvélar Icelandair Cargo munu fljúga sjö sinnum í viku til Liege í Belgíu og þrisvar sinnum í viku til East Midlands í Bretlandi. Þá bíður félagið eftir sem áður upp á fraktþjónustu til allra 40 áfangastaða Icelandair.

Þess ber að geta að mikil bylting varð í starfsemi Icelandair Cargo eftir að Icelandair tók í notkun Boeing 767 breiðþotur þar sem þær vélar taka umtalsvert magn af frakt samhliða farþegaflugi. Nú eru fjórar slíkar í flota Icelandair. Icelandair Cargo áætlar að flytja tæplega 50.000 tonn af frakt á árinu sem er að ljúka, en af því fer um 60% með farþegavélum Icelandair.

 

Gunnar Már Sigurfinnsson, framkvæmdastjóri Icelandair Cargo:

„Samningurinn við FedEx og TNT er einn sá stærsti sem Icelandair Cargo hefur gert um samskonar flutninga. Aukið framboð á meginland Evrópu felur í sér aukin tækifæri fyrir aðra viðskiptavini Icelandair Cargo, t.d. íslenska útflytjendur á sjávarafurðum. Þeirra markmið er að koma vörum sínum ferskum á markað í Evrópu með skjótum, öruggum hætti. Með yfirvofandi útgöngu Breta úr Evrópusambandinu felast tækifæri í því að auka flug til meginlands Evrópu, þar sem stór hluti af þeim fiski sem flogið var til Bretlands fór samdægurs áfram til Meginlandsins. Aukin tíðni til Belgíu tryggir útflytjendum áfram örugga leið á mikilvæga markaði í Evrópu. Samhliða þessari uppbyggingu á leiðakerfi Icelandair Cargo í Evrópu munu umsvif félagsins á flugleiðum til Bandaríkjanna eflast í samstarfi við FedEx og TNT.“

Til baka