Nýtt og ferskt útlit fraktvéla

 Fraktflugvélar Icelandair Cargo hafa verið merktar með merki íslensks sjávarútvegs um ábyrgar veiðar og slagorðinu Absolutely Fresh.

 Flutningur á ferskum sjávarafurðum frá Íslandi á markaði erlendis er ein af undirstöðunum í starfsemi Icelandair Cargo.  Merkingin er viðleitni félagsins til að styðja markaðsstarf íslenskra sjávarafurða á erlendum mörkuðum.  Leiðarkerfi Icelandair Cargo gegnir lykilhlutverki við að tryggja ferskleika, gæði og áreiðanleika íslenskra sjávarafurða.  Ferskur fiskur er verðmætasta útflutta sjávarafurð íslendinga.

"Flutningur á ferskum fiski hefur aukist mjög hjá okkur síðustu misseri og er ein af undirstöðum í starfsemi Icelandair Cargo.  Við markaðssetningu og verðmætasköpun á ferskum sjávarafurðum, skipta auk ferskleika ýmsir aðrir þættir veigamiklu máli, svo sem áreiðanleiki, afhendingaröryggi og síðast en ekki síst sjálfbærni fiskistofna.  Íslandi hefur verið í fararbroddi í heiminum í ábyrgri fiskveiðistjórn.  Þetta merki er tákn íslensks uppruna og ábyrgra veiða og er til þess ætlað að byggja traust og þekkingu viðskiptavina á vörunni.  Við viljum vera öflugur liðsmaður í þessari starfsemi og berum merki íslenskra sjávarafurða með miklu stolti á farkostum okkar,“ segir Gunnar Már Sigurfinnsson, framkvæmdastjóri Icelandair Cargo.

Icelandair Cargo rekur nú fimm Boeing 757-200 fraktvélar, tvær sem fljúga til og frá landinu í áætlunarflugi og þrjár sem sinna ýmsum verkefnum í Evrópu.  Auk þess selur Icelandair Cargo flutningarými  á öllum áætlunarleiðum Icelandair, en félagið býður þjónustu til tæplega þrjátíu staða beggja vegna Atlantshafsins.

Icelandair Cargo rekur söluskrifstofu í Reykjavik, vöruafgreiðslu í Keflavík og hefur eigin sölu- og vöruafgreiðslu í New York í Bandaríkjunum. Þá á félagið dótturfyrirtækið Icelandair Logistic sem rekur starfsemi félagsins í Benelux löndunum og sér um afgreiðslu flugvéla í Liege í Belgíu.  Þá hefur félagið mjög öflugt umboðsmannakerfi í flestum löndum Evrópulöndum sem og á öllum helstu mörkuðum Asíu.

Nánari upplýsingar veitir Gunnar Már Sigurfinnsson, framkvæmdastjóri Icelandair Cargo, sími 840 7077.

Á myndunum er fraktvél Icelandair Cargo með merki íslensks sjávarútvegs og slagorði fyrirtækisins Absaloutly Fresh, í flugtaki.