IATA e-freight

Ísland eða Keflavíkurflugvöllur er núna formlega nýr e-Freight áfangastaður IATA (International Air Transport Association).

Fyrsta sendingin sem e-freight fór frá Amsterdam til Keflavíkur þann 17.nóvember frá flutningsmiðlaranum Rhenus Air B.V. til Jóna Transport hf.  

Til að byrja með verður E-freight á leiðinni Keflavík - Amsterdam/ Amsterdam - Keflavík og milli Rhenus og Jóna.   Í framhaldinu verður öðrum flutningsleiðum bætt við og þeim flutningsmiðlurum sem áhuga hafa.   Í næsta fasa verður skoðað að koma almennum viðskiptavinum inn í e-freight, t.d. fiskútflytjendum.

E-freight verkefni IATA gengur út á það að minnka sem mest pappír sem til þessa hefur verið sendur með frakt.   Þetta er t.a.m. farmbréfið sjálft, undirfarmbréf og önnur undirgögn.   Í staðinn fyrir pappír er notast við rafræn skjöl og skönnuð skjöl.  Flæði þessara gagna er annarsvegar milli flutningsmiðlara til flutningsmiðlara og hinsvegar milli flutningsmiðlara og flugfélaga.  Auk þess koma inn í ferlið afgreiðsluaðilar og tollayfirvöld.

Unnið var í verkefninu í vor og sumar.  Í október voru gerðar prófanir og e-Freight endanlega sett í gang þann 17. nóvember.   Að verkefninu komu IATA, Tollstjóri, Icelandair Cargo, Jónar Transport, TVG-Zimsen, Icetransport og samtök verslunar og þjónustu.

IATA e-freight er núna komið upp í 23 löndum og 107 flugvöllum. 

Nánar má lesa um IATA e-freight á heimasíðu IATA [hér]